As xogadoras do Club Voleibol Ribeira Sacra non deixan de dar alegrías ao club. Despois da gran tempada nas diferentes categorías e a boa actuación do equipo cadete no campionato de España, a Federación Galega de Voleibol vén de convocar a Carolina Camino Fernández á concentración coa selección galega de volei praia que terá lugar os días 25, 26 e 27 de xuño en Boiro (A Coruña).
Trátase dunha concentración previa ao campionato de España de Seleccións Autonómicas (CESA) de volei praia que se celebrará na localidade murciana de Lorca os días 29 e 30 de xuño e 1 de xullo, sendo a primeira vez que resulta convocada unha xogadora do equipo lucense.
Carolina Camino é natural de Quiroga con ascendencia en terras do Bolo (criouse en Lentellais), e iniciouse no mundo do voleibol da man de Antonio García no colexio Manuel Respino da Rúa onde xogou ata que se desprazou á localidade lucense onde fichou polo club que tantas alegrías lles está dando á afección.