Noite do Cortello dos Lobos de Lubián, o 17 de agosto

Entre as pedras dunha ancestral e abraiante trampa circular para lobos oiranse antigas historias. Relatos dun pasado non tan lonxano, no que este era un animal mítico e temido nas terras do concello zamorano de Lubián, cruzando as Portelas.

Dende hai xa varios anos, os veciños deste municipio reúnense nunha noite de agosto no seu Cortello dos lobos para contar e escoitar contos. Desta volta será este venres 17 de agosto.

Tras as narracións, nas que é habitual que poida participar calquera dos presentes, dase paso a unha cea a base de cordeiro. O broche desta “Noite do Cortello”, organizada polo Concello de Lubián e incluído no seu verán cultural, será a música con Fol de Veneno.