Nova xornada con incremento de positivos por Covid nos centros escolares do concello do Barco. Dende a Xunta de Galicia veñen de notificarse dous novos casos de coronavirus no CEIP Otero Pedrayo de Viloira (O Barco). Trátase de dous escolares que xa levan días sen asistir a clases, tal e como confirman dende o centro, que informou xa ás familias do alumnado destes dous novos casos. Polo de agora, o colexio non ten pechada ningunha das súas aulas e están “á espera do que comunique Sanidade”.
Así, o CEIP Otero Pedrayo suma un total de 4 positivos de Covid, tras outros dous comunicados o pasado luns 28 de setembro.
No resto de centros escolares do Barco mantéñense os mesmos datos: 3 positivos no IES Lauro Olmo, 1 positivo no CEIP Condesa de Fenosa (que ten unha aula pechada), 3 no CEIP Julio Gurriarán e 4 no Colexio Divina Pastora. En total neste municipio rexístranse 15 positivos nos centros de ensino.
Tamén se incrementan os positivos no resto de centros da provincia de Ourense, que rexistra neste 3 de outubro un total de 102 positivos e 7 aulas pechadas. A maior parte dos positivos están en colexios da cidade, con ata 60 casos.