O Club Atletismo Rúa teno xa todo listo para o 8º Gran Premio de Montaña-I Andaina Serra de Cereixido que se celebrará mañá nos montes da Rúa e que a día de hoxe conta con 158 inscritos “a falta dos que se anoten mañá”, asegura o presidente do club Fernando Navarro.
Como parte da Liga Galega de Sendeirismo 2024 contará con dúas distancias: a curta será de 15 km e 700 metros aproximadamente de desnivel; e a longa, de 25 km e uns 1.157 metros. Coma sempre a saída será dende a praza de Fontei, percorrendo fermosos sendeiros que atravesan os montes que rodean á vila.
En torno ás 8:30 horas sairán os participantes na andaina longa e media hora despois farano os da curta e tal como adianta Navarro “imos ter bo tempo xa que cambiou a predicción e segundo os novos datos choverá durante a noite e parará en torno ás 8 da mañá”.
