Novo accidente de tráfico mortal nas estradas da provincia de Ourense, desta volta en Viana do Bolo onde, na mañá deste xoves 31 de outubro tiñan que excarcerar a un home falecido dun vehículo tras unha saída de vía, segundo indican dende o 112 Galicia.
Os feitos tiñan lugar sobre as 11:45 horas na OU-533, á altura do punto quilométrico 17-18, en San Cibrao. A esa hora, o 112 Galicia recibía a chamada dun particular solicitando medios de excarceración para unha saída de vía. “Segundo informaban, o turismo atopábase envorcado e cos ocupantes aínda no interior. Tempo despois, informaba de que unha muller que viaxaba no vehículo puido saír do mesmo pero o outro ocupante, un home, estaba atrapado”, explican dende o centro de emerxencias.
De xeito inmediato, pasaban aviso ao Servizo de Urxencias Sanitarias de Galicia-061, aos membros do GES de A Gudiña, aos axentes da Garda Civil e da Policía Local e aos efectivos de Protección Civil da localidade.
“Tras confirmar que o home que estaba atrapado no interior estaba falecido, os equipos de emerxencia procederon coas tarefas de excarceración”, concluen dende o 112. O falecido, veciño de Verín, viaxaba como acompañante.
Fotos cedidas.
