A un intenso, animado e emocionante partido asistía o público na tarde deste domingo 24 de novembro no campo vilamartinés do Bañadoiro, entre o CD Córgomo Vilamartín e o líder da Primeira Futgal, o Antela FC.
Tras golear ao Cartelle (1-6), os rapaces de David Pérez saltaban ao terreo de xogo arroupados pola afección e dispostos a seguir sumando, aínda que eran os visitantes os que se adiantaban no marcador co primeiro gol da tarde no minuto 19. O empate chegaba preto do descanso, no minuto 40, obra de Pablo Vega, rematando a primeira metade co 1-1.
Tralo paso polo vestiario era o Antela quen volvía adiantarse co segundo tanto no minuto 53, sendo Jony quen sentenciaba o encontro cos dous tantos locais que darían a volta ao marcador quedando a pelexada vitoria na casa. Marcaba no 67′ e no 86′, rematando co 3-2 final.
Con este resultado o CD Córgomo Vilamartín sitúase no posto 9º da clasificación empatado a puntos co 8º e co 10º. A seguinte cita para os verdibrancos será de novo en casa, ante o CD Muíños.
