O Sksndalo, local de hostalería e lecer do Barco de Valdeorras, vén de presentar un completo programa de actividades para celebrar o Entroido 2025 por todo o alto. Tendo en conta as principais datas desta festa tan importante para o calendario de lecer de galegas e galegos, a xerencia aposta por reivindicalas propoñendo unha interesante oferta gastronómico-festiva para animar á xente a saír, disfrazarse e escapar da rutina.
Así, dúas desas datas serán os xoves 20 e 27 de febreiro, Xoves de Compadres e o Xoves de Comadres respectivamente. Para eses días o local anima a disfrazarse e pasalo ben ofrecendo unha “pintxada” na que se servirán gustosos pinchos polo prezo de 12 euros a partir das 21:30 horas co acompañamento dunha boa música e o atractivo dun gran baile final. As reservas de entradas poderán facerse, para Compadres, do 14 ao 19 de febreiro, e para Comadres ata o 26 de febreiro.
Para continuar coa festa, e xa chegando aos días grandes e centrais do Entroido 2025, o venres 28 a partir das 23:30h. pinchará Dj Karayán e o sábado 1 de marzo ademais do anterior estará Dj Argü a partir das 23:59 horas.
Para o domingo 2 de marzo o Skándalo céntrase no público infantil convidando a unha festa de disfraces para a cativada de 4 a 10 anos que vaia acompañada dun adulto, das 17:30 a 20:30 horas. Para eles haberá baile, tatoos, palomitas, algodón de azucre, photocall e outras sorpresas…
Como peche a esta completa programación o Martes de Entroido, 4 de marzo, haberá unha Gran Festa Fin de Carnaval a partir das 18 horas.
