Na xornada deste venres 21 de febreiro, Escolas Católicas de Galicia entregaba os VII Premios de Innovación Educativa, no marco da súa Asemblea anual de titulares e directivos. Alí, representantes de Escolas Católicas de Galicia, José Manuel Rodríguez e Sonia Vidal de SM eran os encargados de entregar os galardóns aos proxectos máis innovadores do ano.
“Desde o principio coidamos a nosa mente; desde o principio coidamos o noso benestar” é o título do proxecto premiado do Colexio Pablo VI-Fátima da Rúa. “Un traballo que viu a luz con motivo do Día Mundial da Saúde Mental, durante unha xornada de sensibilización e formación para o alumnado de secundaria”, explican dende o centro.
Baixo a coordinación da súa orientadora, Ángeles Terrón Cobo, a actividade deseñouse para dotar aos estudantes de ferramentas e recursos que lles axuden a mellorar o seu benestar emocional, físico e social. “A idea da xornada xurdiu como unha resposta a diversas situacións observadas no alumnado durante o curso anterior: falta de autorregulación emocional, desinterese, desmotivación, ansiedade, problemas de comunicación”, explican dende o centro que, ante esta realidade, apostou por unha estratexia de concienciación que involucrase tanto aos estudantes como ao profesorado, co fin de xerar unha reflexión colectiva sobre a convivencia e o rendemento académico. Ademais da orientadora, ao acto asistían o director do Pablo VI-Fátima, José Fernández de Abaixo e o ata o de agora Xefe de Estudos, Avelino García Ferradal.
Estes premios reflicten o compromiso de Escolas Católicas de Galicia coa innovación e a mellora continua na educación, impulsando proxectos que non só fomentan a aprendizaxe, senón que tamén priorizan o benestar integral dos alumnos. A clausura corría a cargo de Monseñor Francisco José Prieto, arcebispo de Santiago de Compostela quen puxo en valor a “importancia da misión compartida, unha proposta que marca un estilo propio nos centros de Escolas Católicas”.
Fotos cedidas.
