Con gran ilusión e emoción agardaba esta data a veciñanza de Cernado (Manzaneda). Esta aldea acollía a partir das 11:30h deste sábado a Fuliada da Mourela p’acá, que organizan os pobos desta zona e que cada Entroido se celebra nunha localidade diferente. Desta volta a chuvia aparecía como convidada non desexada e deslucía o principio do ritual: a petición de permiso en verso do fulión visitante aos representantes da aldea. Solicitude que era aceptada, tamén en verso, por Cernado.
A partir de aí comezaba a ronda do fulión, coa danza de numerosas Mázcaras. Unha ronda interrompida en tres ocasións para repoñer forzas coas viandas e bebidas sacadas polos veciños, e que remataba nas proximidades da carpa onde realizaba a fuliada, unha representación satírica en verso, con diferentes personaxes segundo os temas e que fai un repaso ao acontecido no último ano. Entre os asitentes á fuliada estaba o músico Carlos Núñez.
Fotos e vídeos: Carlos G. Hervella.
Ampliarase galería fotográfica en breve.
