Na mañá do venres 14 de marzo entregábanse en Trasalba (Amoeiro), os Premios Anuais Otero Pedrayo para estudantes de ESO e Bacharelato.
A esta cuarta edición do premio asistía Valentín García Gómez, Secretario Xeral da Lingua; Rosendo Fernández, enrepresentación da Deputación de Ourense; Xesús Alonso Montero e María José Bravo Bosch como representantes do xurado; e Eduardo López Pereira, presidente da Fundación Otero Pedrayo.
Na categoría de Bacharelato o xurado acordou concederlle o premio a “Bocarribeira”, traballo presentado polas alumnas Marta Bouzo Álvarez e Aldara Rodríguez Rodríguez de 1º de Bacharelato do IES Aquis Querquernis de Bande. A peza audiovisual rende homenaxe á literatura na obra poética de Ramón Otero Pedrayo.
Na categoría de ESO, o xurado decidiu premiar a peza grupal presentada baixo o pseudónimo “O borracho”, un podcast cargado de humor e actualidade traballado sobre un texto teatral de Otero Pedrayo incluído na obra “Teatro de máscaras” (1975). Foi o alumnado de terceiro da ESO do IES Alexandre Bóveda de Vigo quen recolleu o galardón.
Ademais dos gañadores nomeados, o xurado do premio Otero Pedrayo para estudantes concedeu un accésit ao traballo ”Fálase tanto… e con tan pouco tino” presentado polo grupo de 4ºESO do IES Breamo de Pontedeume. O alumnado converteu en historia ilustrada o conto de don Ramón “O purgatorio de don Ramiro”.
