Tres alumnos de 6º de Primaria do Colexio Plurilingüe Divina Pastora MM Franciscanas de Ourense conseguiron unha destacada vitoria na fase de zona do ‘Rebumbio de Matemáticas’ celebrado en Ourense, o que lles valeu a clasificación para a fase final de Galicia, que se celebrará o vindeiro venres 16 de maio na Coruña. Alí competirán cos mellores equipos de toda a comunidade nunha xornada repleta de retos matemáticos. Se superan esta fase irán a Murcia e despois a Olimpíada Internacional.
O equipo formado por Mario Cuquejo, Lois Ascon e Lucas Kienast demostrou “un gran nivel de razoamento, traballo en equipo e paixón polas matemáticas, froito non só do seu esforzo, senón tamén do acompañamento e a preparación recibida por parte das súas profesoras, Rosa e Anabel, quen foi un piar fundamental durante todo o proceso”, aseguran dende o centro, destacando tamén a “excelente participación do resto de compañeiros e compañeiras que, aínda que non lograron clasificarse, competiron cunha actitude exemplar, mostrando compromiso, entusiasmo e un gran nivel académico”.
Ecovixiantes e a Astronomía
Nesta semana e de forma paralela, os Ecovixiantes de Franciscanas participaban nunha actividade vencellada coa Astronomía na Aula da Natureza de Oira, cuxos obxectivos son “coñecer as estrelas e as principais constelacións que podemos ver desde aquí e saber situalas na bóveda celeste; aprender nocións básicas das enerxías renovables que nos proporcionan as estrelas; coñecer as rutas das constelación”.
E para iso asistían a un obradoiro de practicas de observación, traballando con telescopio e prismáticos. Como son e como os utilizamos para observar o Sistema Solar e para atopar os planeta no ceo, son algunhas das nocións que aprenderon os participantes.
Fotos cedidas.
