A piques de comezar a pretempada e, confirmadas as saídas do filial e do equipo de Terceira RFEF, o Centro de Deportes Barco abre a campaña de inscricións para a base, co firme propósito de “sacar equipos en todas as categorías, desde benxamín ata xuvenil”, avanza o presidente, Nilo Ramos.
Esta semana comeza a rolda de captación de xogadores que queiran competir e xa a partir do 1 de setembro farano as escolas de fútbol que non compiten. “A idea é apostar por adestradores novos e con ganas de dar o mellor de si mesmos, formándoos con bolsas gratuítas pagadas polo club”, adianta Ramos, explicando que intentarán que xogadores do primeiro equipo leven as rendas iniciais deste novo e ambicioso proxecto para o que xa teñen confirmados catro que darán “frescura para sentar as bases dun proxecto de futuro”, di Nilo, consciente das limitacións “demográficas e de estudos, sobre todo en idade xuvenil, que temos nesta zona coa fuga continua de bos xogadores que deixan o fútbol ao marchar a estudar fóra”.