Con moi bos resultados rematan o ano o cadete e o filial do Victoria CF, os dous equipos de fútbol feminino que adestra a técnica valdeorresa Isabel Vázquez, campión e subcampión de inverno respectivamente.
As primeiras, proclamábanse campioas do grupo 1 – LGF Cadete con 27 puntos, tras 9 vitorias en 9 partidos, con 59 goles a favor e unicamente 4 en contra. No último partido, disputado o sábado 20 de decembro goleaba 10-0 ao Val, “sendo o equipo máis goleador do grupo e o segundo que menos goles encaixa”, destaca Isabel que ten a Alba Muñiz como segunda adestradora.
As segundas, xogadoras do filial, son subcampioas de inverno da LGF 1ª División Arzúa Ulloa DOP con 28 puntos (9 vitorias, 1 empate e 2 derrotas) “sendo o equipo máis goleador da categoría e o terceiro que menos goles encaixa ata o momento”, puntualiza a técnica que conta con Gonzalo Bouzas como segundo adestrador no corpo técnico deste equipo. No último partido do ano, disputado o domingo 21 de decembro, vencía 6-0 ao CD Arenteiro.
Agora, cos deberes feitos, toca descansar e recargar as pilas para afrontar o que queda con enerxía. “Co filial retomaremos os adestramentos o 30 de decembro para preparar a primeira rolda da Copa Coruña contra Orzán SD que xogaremos o domingo 4 de xaneiro”, di Isabel, explicando que co cadete retomarán os adestramentos un pouco máis tarde, o 7 de xaneiro para afrontar a xornada 11 de liga, na que xogarán contra Orzán SD, o sábado día 10.
Fotos cedidas.