En pleno Camiño de Inverno ao seu paso polo concello lucense se Quiroga, os peregrinos poden atoparse cun posto de froita, auga e mesmo café diante dunha casa en Montefurado. O seu propietario, Casimiro Mondelo Rodríguez, atendeunos dende hai ano, sempre que pudo, convidándoos a facer un alto no camiño.
Hoxe, Casimiro ten cen anos e aproveitando o décimo aniversario do recoñecemento do Camiño de Inverno a Santiago como ruta xacobea, a Federación Galega de Asociacións de Amigos do Camiño de Santiago, realizaba un acto de recoñecemento para agradecerlle “o seu destacado compromiso, dedicación e valiosa contribución ao Camiño de Santiago e aos peregrinos que por el transitan”.
No acto de homenaxe celebrado en Montefurado, no mediodía deste martes 7 de abril, ao que acudían numerosos veciños, participaba a Asociación Vía Franciscana de Chipiona (Cadiz), con catro membros que fixeron case mil quilómetros para asistir a este recoñecemento, dunha persoa que eles cualificaron como referente no Camiño de Inverno pola súa hospitalidade e afabilidade cara o peregrino. “No ano 2023 fixemos o Camiño de Inverno e encantounos, sobre todo porque Casimiro nos atendeu estupendamente. Pareceunos unha persoa emblemática e pensamos que en todos os camiños debería haber unha persoa así, que te acolla desa maneira e dende entón mantivemos a amizade a través de Daniel da Asociación de Peregrinus Dezae a quen coñecimos tamén ese ano. E que mellor ocasión que volver a velo que neste acto de homenaxe, sen importar os 900 quilómetros que nos separan, fixémolos gustosos porque desfrutaremos deste día e sobre todo para facelo feliz a el xa que el fai feliz a tantos peregrinos”, explicaba o representante da asociación que lle facía entrega dunha placa como agasallo.
En representación de todas as asociacións do Camiño de Inverno a presidenta da Asociación de Amigos do Camiño de Santiago por Valdeorras, Asunción Arias, destacou a bondade e a entrega de corazón dun veciño 100% hospitalario cos peregrinos. “É para nós unha persoa moi entrañable, polo labor desinteresado que fai de atender ao peregrino independentemente da nacionalidade que teña e particularmente dase a casualidade de que cando eu fixen a ruta con Discamino estaba e tiña moitas ganas de coñecelo. Hoxe volve ser unha aperta cara el como ser humano porque intentei por todos os medios que fose á estrea do documental no que aparece pero non foi posible co cal aquí estou eu”, dixo.
Sobre a capacidade de Casimiro para recibir aos peregrinos e da súa importancia para o camiño tamén falaría o Director do Plan Xacobeo, Ildefonso de la Campa, que lle facía entrega dun diploma de recoñecemento, “en agradecemento sinceiro polo seu exemplar labor de hospitalidade e adicación constante ao servizo do peregrino. Pola súa xenerosidade, espíritu solidario e entrega desinteresada, que honran a tradición de acollida e fraternidade cara a quenes percorren o Camiño, brindando apoio, consolo e amparo ao seu paso pola nosa terra. O seu compromiso engrandece o espírito do Camiño e deixa pegada no corazón de cada peregrino que atopa en Montefurado un lugar de descanso e humanidade”. Ademais do diploma de la Campa tamén lle entregaba a Casimiro dun peregrino de porcelana.
O equipo de Goberno de Quiroga, participaba nesta homenaxe de celebración dun novo centenario no municipio e, en nome de todos os quirogueses, o alcalde, José Luis Rivera, facíalle entrega dunha placa conmemorativa, asegurando orgulloso que contan con varias veciños de 100 anos e incluso máis.
Tras entrega doutro diploma de recoñecemento da Federación Galega de Asociacións de Amigos do Camiño de Santiago, en nome de todas as asociacións, o homenaxeado daba as grazas emocionado, asegurando ser “un home de poucas palabras e pouco estudo”, recoñecendo o bo trato que sempre lle adicaron os peregrinos que pasaron por diante da súa casa “portáronse todos de maravilla e paseino moi ben con eles”, dixo, dando paso a un pequeno convite para todos os participantes na casa do pobo, antiga escola onde estudaba o propio Casimiro.
Fotos e vídeos: Carlos G. Hervella.