Entre aplausos e bágoas despedíase do seu cargo de concelleira de Medio Ambiente dentro do equipo de goberno do Barco, tras 11 anos, a socialista Diana Urdangaray. A toma en consideración da súa renuncia ao posto tiña lugar na parte final da orde do día do pleno ordinario deste 3 de setembro e na súa intervención comezaba explicando que o motivo de “dar este paso ao lado e pechar este ciclo municipal” é por motivos laborais. “Comecei a traballar nunha empresa con sede en Ourense, o que me complica moito poder conciliar a vida profesional e a laboral”.
Para Urdangaray, que tamén era segunda tenente de alcalde, “asumir a xestión ambiental do Concello do Barco foi un proxecto enriquecedor e complexo, sei que a miña Concellería non é “tan recoñecida” como outras pero son moitos os logros importantes que conseguiron a través dela”.
A partir de mañá, proseguía, “volvo ser unha veciña máis, agradecida de ser consciente de todo o que implica sacar unha Concellería adiante, pido perdón polos erros que cometín que, por suposto, non foron intencionados. E pídolle desculpas aos meus compañeiros de partido por deixalos a tan só 9 meses de cumprir a lexislatura, pero eu son das que pensa que para estar de concelleira hai que dar o 100% e eu nestes momentos non podo dalo”.
E remata con agradecementos e asegurando, con relación á persoa que ocupará o cargo que ela deixa, Javier Rodríguez Tato, que “sei que quedades en boas mans. Javier, deséxoche o mellor nesta andadura que vas comezar”.
Pola súa banda o alcalde do Barco, Aurentino Alonso, agracecía a “súa lealdade e dispoñibilidade” e manifestaba que era perfectamente comprensible que o seu novo rumbo profesional lle impida compatibilizar ese labor co cargo.
Fotos: A.R.
Vídeos: O SIL.