Tras debutar en 2019 co seu primeiro poemario chamado “Desvelos”, o autor nado en Sanlúcar de Barrameda Ángel Martínez presenta este luns 4 de marzo ás 20h. no Ateneo de Madrid o seu segundo traballo denominado “Semillas de amapola. Poesía climática, fotografía y otras reflexiones” xunto á editorial Kafkian.
A presentación contará coa presenza de Cristina Narbona, quen achega a súa faceta de pioneira na loita climática, de Lucía Álvarez, actriz natural de Mouruás (San Xoán de Río) que recitará algúns dos poemas da obra e Farid Bentria, que desde a súa óptica mixta tangerina e granadina, será o moderador do evento.
As sementes deste novo libro representan de maneira polisémica a capacidade da mapoula de relaxar pola súa orixe opiáceo, pero tamén unha semente onde crecer nos lectores e lectoras varias reflexións, entorno ao amor nas súas distintas vertentes ou á influencia que ten o clima e os fenómenos na actual forma de vivir.
O autor inclúe tamén fotografías feitas por el mesmo para lograr que os poemas teñan un contexto visual, incluso algúns do mesmo momento e lugar onde foron creados.
De familia de exiliados políticos en México, o autor tamén fai un exercicio de memoria e relaciona eses campos de mapoula coa funesta memoria dos desaparecidos en España durante o golpe de estado e a Guerra Civil.
