Este sábado 21 de novembro era unha data moi especial para Aquilina Álvarez, natural de Millarouso (O Barco). Este mediodía sentíase moi feliz e mesmo emocionada de estar rodeada pola súa familia para festexar os seus 101 anos. A celebración tiña lugar nun xantar que tiña lugar no Mesón O Isla, en Viloira.
Este veciña de Millarouso ten un fillo e unha filla, ademais de cinco netos e seis bisnetos. Sempre traballou no campo, sachando, e coidando do gando. “Tiñamos galiñas e coellos e vacas, sempre traballei na casa”, comenta. E, mesmo agora, de vez en canto gústalle achegarse pola horta.
Nada máis erguerse cada día almorza con tranquilidade, fai a súa cama, e despois, ademais de facer algunha tarefa doméstica como barrer ou pasar a mopa, tamén se gusta saír a dar un paseo, e acostuma ver a telenovela.

Conta que sempre lle gustaron as festas e, especialmente, bailar. “Aínda que agora xa no valgo para iso”, matiza cun sorriso. Neste 21 de novembro manifestaba a súa gran alegría por xuntarse coa familia e, na festa polo seu aniversario non faltaban a tarta, coas candeas, os agasallos e, sobre todo, a atención e o agarimo dos seus seres queridos.
Fotos: O SIL/cedidas.
