A formación que dirixe Manuel Prada dará un concerto ás 18:30h. do domingo 16 de setembro
Por vez primeira o son da Banda de Música do Barco poderá escoitarse en Trives. Esta formación, da que forman parte varios instrumentistas triveses, actuará o vindeiro 16 de setembro no marco das Festas do Cristo e da Dolorosa.
A banda, que dirixe Manuel Prada Ramos, dará xa ás 10:30h. un pasarrúas pola vila na mañá do domingo. Despois, ás 12:30h. acompañará á procesión da Dolorosa e pola tarde, ás 18:30h. ofrecerá un concerto no que os triveses e visitantes poderán desfrutar do seu variado repertorio.