Con moitas ganas se van recuperando as celebracións. E así o demostraba o cento de persoas que na noite deste sábado 26 de febreiro asistían, a maioría disfrazadas, á Festa de Carnaval 2022 organizada pola Asociación Casino de O Barco.
O acto central do programa era a contundente cea elaborada e servida por Mantesil a base de codillo, androlla, chourizo, patacas, garavanzos, grelos e orellas de Carnaval, ademais de viño Mencía, café e chupito. De seguido era o grupo Gin Toni’s quen se encargaba de abrir a sesión de baile cun concerto que remataba coa sesión disco dos DJs Losi e Dani Argu.
E se onte eran os maiores os que desfrutaban do Entroido, na tarde deste domingo 27 de febreiro, os protagonistas eran os pequenos, cunha festa infantil de disfraces no segundo andar do Casino que comezaba en torno ás 18 horas con merenda e animadora.
Fotos cedidas.
