Era unha das novidades da XXIV Feira do Viño de Valdeorras e resultaba todo un éxito. Tanto organizadores como participantes na I Cata Popular desta mostra, que se celebraba no mediodía do domingo no patio interior da Casa Grande de Viloira (O Barco), valoraban de maneira moi positiva a iniciativa.
Nela participaban uns 30 catadores (inscritos previamente no Consello Regulador da D.O. Valdeorras) en tres quendas de dez, que valoraban 9 viños brancos e 6 tintos das adegas participantes na feira. O resultado das súas puntuacións dábao a coñecer na parte final da mostra, ás 22:30h de onte, o presidente do CRDO Valdeorras, José Ramón Rodríguez.
Así o premio ao mellor viño da cata popular correspondíalle ao Domus Crianza de Roandi, mentres que o mellor branco era para o godello A Coroa, da adega do mesmo nome. Antes da entrega de galardóns, na que participaba o alcalde do Barco, Alfredo García, e a concelleira de Turismo, Alba Rodríguez, procedíase ao sorteo de tres packs de viños da D.O. Valdeorras entre os catadores populares. Os afortunados eran Pablo Gamarra, Daniel Andrés Paradelo e Guillermo Carbajo.
Fotos: Carlos G. Hervella.
