A Denominación de Orixe Monterrei vén de pechar a campaña de vendima 2022 alcanzando a cifra de 6,5 millóns de uva colleitados. Con respecto á cifra de variedades vendimadas, recolléronse 4,5 millóns de quilogramos de uva branca, mentres que de tinta foron uns 2 millóns, segundo vén de informar o seu consello regulador.
Como en campañas anteriores, a variedade godello foi a máis abundante, con 3,2 millóns de quilogramos de uva producidos. Tras elas, sitúanse mencía (1,5 millóns), treixadura (preto de 900.000 quilogramos) e aráuxa (aproximadamente 300.000 quilogramos). Con todo tamén se colleitaron variedades como dona branca, albariño, loureira, merenzao, sousón e caíño tinto.
“O estado fitosanitario da uva foi excelente”, destaca a presidenta do Consello Regulador, Lara Da Silva Rodríguez, “levouse a cabo unha vendima gradual, para acadar o grao de maduración óptimo da uva segundo a variedade, así que os resultados non só foron moi bos a nivel cuantitativo senón tamén cualitativo”.
A campaña de vendima iniciouse o 1 de setembro, coa adega Castro de Lobarzán e finalizou o 9 de outubro, sendo a adega Crego e Monaguillo a última en pechar o período de recolección de uva.
Foto cedida.
