OurenseÚltima hora

A Galiciencia abre o período de recepción de proxectos

A feira científica selecionará 80 traballos para o X aniversario que terá lugar do 18 ao 20 de novembro en Ourense
Imaxe de Galiciencia 2014.
Imaxe de Galiciencia 2014.

O Parque Tecnolóxico de Galicia-Tecnópole abre ata o próximo 25 de outubro o prazo de recepción de proxectos para a Galiciencia 2015. A maior feira científica de Galicia, que terá lugar entre o 18 e o 20 de novembro en Ourense, inicia así o proceso de selección dos 80 proxectos cos que celebrará o seu X aniversario.

Aos habituais 50 traballos presentados por equipos de estudantes de Secundaria, Bacharelato e FP que competirán polo primeiro premio do certame, súmanse fóra de concurso 30 proxectos máis de alumnos de Primaria e Educación Especial.

As bases están xa dispoñibles en www.galiciencia.com. Os 50 proxectos participantes na competición estarán expostos durante os tres días da feira, mentres que os de Primaria e Educación Especial poderán verse en quendas de 10 proxectos diferentes cada día.

"MIcro", mascota gañadora do concurso.
“MIcro”, mascota gañadora do concurso.

A celebración desta edición da Galiciencia comezou xa no mes de marzo cunha xira de espectáculos científicos por toda Galicia, cun ciclo de cursos para que os docentes poidan axudar mellor aos seus alumnos a preparar proxectos e co concurso para o deseño da mascota oficial do evento. O elixido foi “Micro”, creado por Sira Ricoy, alumna de 1º da ESO do IES Carlos Casares de Vigo.

Como novidade, este ano os premios serán entregados por categorías temáticas en lugar de por ciclos educativos. Así, serán seleccionados polo xurado o proxecto coa mellor presentación oral, o máis innovador, o que acredite o método e proceso de investigación máis definido e o mellor do eido das humanidades. De entre todos estes, o que consiga a maior puntuación levará o primeiro premio, dotado con 1000 euros para financiar a súa participación na maior feira científica a nivel estatal, a Exporecerca 2016.

Para participar, o requisito fundamental é formar un equipo de dous alumnos e un profesor e contar a idea en tres folios, xa sexan proxectos experimentais e tecnolóxicos ou traballos documentais.

Artigos relacionados

Back to top button