“De verdade serve para algo escavar un castro?”. Arredor desta cuestión desenvolvíase esta mañá de 22 de xuño o I Encontro Florentino López Cuevillas sobre a Idade do Ferro en Galicia e o noroeste peninsular no Parque Arqueolóxico da Cultura Castrexa-PACC Lansbrica (San Amaro). Este encontro rendía ademais homenaxe á figura de López Cuevillas, de feito a estaba dedicada a primeira ponencia do programa: ”F.L.C, un pioneiro do estudo científico dos castros”, a cargo de Xulio Rodríguez González.
Despois estaba prevista a intervención de Yolanda Álvarez González, co relatorio: “10 anos de intervencións arqueolóxicas na Cidade de San Cibrao de Las”. Tamén se abordaba a ”revolución das novas tecnoloxías na investigación arqueolóxica, a súa aplicación en castros galegos” da man de César Parcero-Oubiña, e tamén a realidade castrexa dende a perspectiva de xénero con Andrea Mouriño.
Ademais, o arqueólogo Xurxo Ayán expoñía a escavación do castro de San Lourenzo (A Pobra do Brollón, Lugo) como un exemplo de “arqueoloxía en comunidade”. Finalmente, tiña lugar o relatorio ”Pensan as galegas e os galegos en castros?” de Manuel Gago Mariño. As xornadas pechábanse cunha degustación de viño do Ribeiro.
Fotos: PACC Lansbrica.
