O Consorcio de Turismo da Ribeira Sacra, a través do seu Plan de Sostenibilidade Turística, financiou o proxecto de creación dunha nova páxina web para os Museos de Quiroga e a creación da ruta literaria denominada: “Quiroga, territorio literario”. A nova web dos museos de Quiroga, emprazada na mesma dirección que a anterior: museosquiroga.org, inclúe tres espazos museísticos: o Museo Etnográfico, o Museo Xeolóxico e o Museo ao Aire Libre do proxecto “Arte no Ar” composto pola Ruta da Arte Urbana e a ruta literaria denominada “Quiroga, territorio literario”.
O novo espazo web dos Museos de Quiroga, polo que se refire ao Xeolóxico e o Etnográfico, mellora substancialmente a accesibilidade dos mesmos, xa que a partir da lectura dun código QR que conduce á páxina pódese acceder á explicación de cada unha das salas en tres idiomas: galego, castelán e inglés. Ademais, no caso do Museo Xeolóxico, a través dos mesmos códigos QR, pódese acceder á versión dos paneis tamén nos tres idiomas. Dende a propia páxina pódense realizar reservas online, obter información sobre prezos e horarios fixos e especiais, ou mesmo descargar o impreso para satisfacer as taxas municipais pola visita.
O aspecto máis novidoso desta páxina é a incorporación do proxecto de museo ao aire libre bautizado como “Arte no Ar”, que contempla por unha banda a ruta literaria “Quiroga, territorio literario” e por outra unha ruta de arte urbana con 19 emprazamentos.
O proxecto “Quiroga, territorio literario” recolle a idea trasladada aos técnicos de cultura por varias persoas relacionadas coas letras e as artes: Celia Díaz, Xosé Estévez, Pepe Mondelo e Eva Teijeiro.
Finalmente, o seu desenvolvemento, achéganos unha ruta literaria (pódese facer andando ou en calquera vehículo) que percorre os lugares relacionados con seis escritores que se viron, en maior o menor grao, influenciados polo microcosmos das terras quiroguesas.
Non é un proxecto pechado, para a primeira fase seleccionáronse seis recoñecidos escritores xa falecidos: Pura e Dora Vázquez, Ernesto Guerra da Cal, Eduardo Moreiras, Luis Losada, Ánxel Fole e Manuel María. “A ruta dos escritores vinculados en vida e obra con Quiroga debe medrar porque non están todos os que son…”, din dende o Concello.
A ruta literaria dentro da proposta de museo ao aire libre “Arte no ar”, ofrece a posibilidade de coñecer lugares fondamente vinculados aos autores sinalados, por diferentes motivos: Pura e Dora Vázquez viviron en Quiroga sendo nenas; Ernesto Guerra da Cal, con familia quiroguesa, viviu coa súa tía en varios lugares da vila durante a súa nenez e adolescencia; Eduardo Moreiras naceu en Quiroga e volveu con frecuencia a estas terras para explorar vales, ríos e montañas; Luis Losada naceu no San Vitoiro do século XVIII; Ánxel Fole residiu na Veiguiña para protexer a súa integridade despois da Guerra Civil; a avoa de Manuel María era do Hospital, ademais fixo fondas amizades nestas terras que o impulsaron a dedicarlle unha marabillosa obra composta por 30 sonetos.
Incorporada na interpretación, accesible a través de calquera dispositivo móbil, pódense escoitar anacos seleccionados das súas obras, grazas á colaboración de varios veciños e, sobre todo, das comunidades educativas do CEIP e o IES de Quiroga, coa participación de máis de 30 mozos e mozas destes centros.
Outra das posibilidades que ofrece o museo ao aire libre é a ruta da arte urbana que discorre por un total de 19 emprazamentos, que amosan distintas disciplinas artísticas. Cando a arte urbana chegou a Quiroga foi para quedarse e formar parte do noso universo. Son moitas as persoas e organismos que xuntaron esforzos para que diferentes manifestacións artísticas se abran paso a través de varios edificios da vila: a Asociación Cultural Quiroga en Marcha, o Concello de Quiroga, o Consorcio de Turismo da Ribeira Sacra e a Deputación Provincial de Lugo, promoveron un latexo de vida e cor que amosa as nosas raíces, a nosa cultura, a nosa forma de vida e o intenso xeito no que sentimos as cousas os quirogueses.
