Nun comunicado emitido na tarde do 26 de outubro a Plataforma Sanitaria de Valdeorras pide que se manteñan as dúas prazas de médico no Centro de Saúde Rubiá. Esta entidade considera que a perda dunha desas prazas é “unha nova agresión aos valdeorreses que cada día que pasa soportamos peores servizos públicos. A Plataforma Sanitaria de Valdeorras está cos veciños de Rubiá na defensa dos seus dereitos e apoiará todas as medidas que consideren oportunas para non perder o segundo médico de familia”.
No seu comunicado a Plataforma Sanitaria de Valdeorras asegura que “a Xunta xa suprimiu un médico de familia en A Veiga, e intentou o mesmo no concello de Vilamartín. Tamén quixo desfacerse dun pediatra en Trives. E agora quere deixar o concello de Rubiá cun só facultativo dos dous que até o de agora viñan atendendo aos veciños dun concello con serias carencias de asistencia”.
Asemade esta plataforma amosou o seu respaldo ás diversas accións que os veciños de Rubiá teñen previsto iniciar “para concienciar da agresión que significa este feito de perda de recursos asistenciais”.
