Co tradicional canto, de casa en casa, comezaba na noitiña do 2 de xaneiro a antiga Festa de Reis na Mezquita. Esta celebración, que antano tiña un carácter marcadamente masculino, abríase dende o pasado ano á participación das mulleres e así mozos e mozas iniciaban un traxecto pola localidade tocando e canto xuntos.
Ese mesmo percorrido repetíano a partir das 11h. deste 3 de xaneiro dende a Casa dos Reis para recoller os aguinaldos. Desta volta a comitiva dos Reis (encabezada polas autoridades: Rei e Virrei, Raíña e Virraíña), ía acompañada polos Zamarreiros, uns personaxes enmascarados que só aparecen nesta data, e polo “Demo da Seitura” ou “Carrabouxo”. Ademais, levaban un carro, adornado polos ramos de Reis, e no que se ían depositando os aguinaldos dos veciños: chourizos, xamóns, doces, cartos…
Tras completar a ronda pola Mezquita, animada pola música tradicional de Os Bertolini de Manzaneda, homes e mulleres celebraban, por separado, o seu primeiro xantar desta festa que se prolongará ata o 5 de xaneiro. Ademais a primeira hora desta tarde terá lugar unha recreación da corrida dos galos, con sorpresas.
Fotos cedidas, agás as quince últimas de galería que son de Carlos G. Hervella.
