Situado no pobo do mesmo nome e declarado BIC en maio de 2006, o Santuario das Ermitas, no concello de O Bolo, é barroco na súa maior parte, e a súa construción débese á curación milagrosa que obrou a Virxe a un bispo de Astorga chamado D. Alonso Messía de Tobar. Agradecido por tal feito, o bispo mandou edificar unha nova igrexa en 1624, comezo da que coñecemos actualmente á que se lle foron engadindo novas construcións como a casa da administración, ampliación do atrio ou o pórtico, o Vía Crucis e unha pousada para os peregrinos que chegaban ao Santuario coa esperanza de que a imaxe milagrosa de As Ermitas cumprise a súa petición, ou en acción de grazas por ter visto cumprido os seus rogos.
No interior, o templo posúe un nicho no que está exposta a Virxe ademais dunha gran variedade de retablos e imaxes; mentres que a fachada consta de dúas partes claramente diferenciadas: a fachada central e as torres, a da dereita do século XVII e a da esquerda do século XVIII.
Con respecto aos principais cultos que se celebran, ademais de cerimonias como vodas ou bautizos, están os da Semana Santa (destacando os do Venres Santo) e a celebración do Rosario adicada á Virxe, o primeiro domingo de outubro, unha das eucaristías máis concorridas, tal como adiantan os sacerdotes, na que ademais da misa se reza o rosario.
Así o facían na mañá deste domingo 2 de outubro os numerosos fegreses que acudían ao santuario para render culto á Virxe, asistinto á eucaristía, á procesión coa imaxe e ao rosario.
Fotos e vídeos cedidos.
