Tempo de vendima na Biblioteca Florencio Delgado Gurriarán do Barco. Pero en lugar de acios de saborosas uvas, o que recollían os asistentes á actuación de Soledad Felloza na tarde deste xoves eran versos, uns versos moi especiais: os do poeta corgomés que dá nome a estas instalacións, homenaxeado nas Letras Galegas deste ano.
Versos entrelazados con relatos persoais desta actriz e narradora oral e cos da vida de Florencio ao longo das súas diversas etapas vitais e creativas. Primeiro na súa Valdeorras natal, logo na súa viaxe cara ao exilio, que remataba en México, e na que súa maleta, ademais dun pouco de terra e das súas libretas de versos, levaba o “seu paraíso”: as paisaxes, a memoria da súa terra valdeorresa e a súa lingua.
