A tempada de caza maior dará comezo mañá, sábado 22 de agosto, co período hábil para especies como o corzo e o xabaril. Así, estenderase ata o 28 de febreiro de 2021.
A captura deste animal silvestre poderá realizarse os xoves, sábados, domingos e festivos en tecores ou en zonas libres, onde están permitidas as modalidades de batida, montería e espera.
No caso do corzo, permítese a captura nos terreos de réxime cinexético especial (tecor) todos os días hábiles na modalidade de axexo, mentres que os sábados, domingos e festivos, en batida e montería; mentres que nos terreos de réxime cinexético común (zonas libres) permítese a caza de corzo todos os días hábiles na modalidade de axexo, e a modalidade de batida e montería só poderá practicarse os sábados.
Por outra banda, esta fin de semana tamén se inicia o período hábil para algunhas especies de caza menor na media veda, como o paspallás, a pomba torcaz e a rula común, en exclusiva para os tecores da antiga Lagoa de Antela en Ourense.
