Nesta semana a Policía Local comezará a realizar visitas informativas e tamén controis nos diferentes establecementos de hostalaría do Barco co fin de comprobar que se están a cumprir as medidas sanitarias fronte ao Covid-19 neste sector e do protocolo do “Plan Hostalaría Segura”. En total está previsto que se visiten máis de 70 establecementos.
O Plan Hostalaría Segura recolle, para facilitar o cumprimento do aforo sanitario e garantir as distancias de seguridade, que os establecementos deberán ter montadas as cadeiras e mesas que se correspondan coa capacidade do local en condicións normais e indicar con bandas e adhesivos aquelas que non se poden ocupar, segundo as porcentaxes máximas permitidas.
Desta maneira a Policía Local vai supervisar o cumprimento da normativa sanitaria, en especial no control do aforo dos establecementos (un 50% en terraza e un 30% no exterior no caso do Barco nestes momentos), tamén nas distancias entre mesas, así como o feito de contar cun cartel visible no exterior dos establecementos que informe da capacidade máxima do local e o aforo, tanto no interior coma no exterior, segundo a normativa vixente (que será obrigatorio a partir do 12 de marzo). Así mesmo, os establecementos hostaleiros tamén deberán facilitar o acceso aos clientes do código QR para que estes poidan rexistrar a súa presenza (algo que tamén será obrigatorio dende o 12 de marzo).
Durante as visitas os axentes comprobarán o cumprimento do aforo permitido, os horarios de apertura e peche e que tanto clientes como empregados respectan as medidas de prevención ante o Covid-19 como a distancia de seguridade interpersoal e o uso obrigatorio de máscara. De non respectarse as medidas, procederán a tramitar a sanción correspondente.