As xornadas de “Elaiografía Macroscópica”, centradas na descrición e identificación de variedades de oliveiras, celebrábanse no IES de Quiroga durante dúas xornadas: os venres 19 e 26 de abril. Nelas participaban unha vintena de asistentes, de diversos segmentos socio-económicos, e quedou patente o interese e a utilidade para o coñecemento do sector, ambos os manifestados no debate final.
“A determinación dos parámetros considerados e da habilidade mostrada pola totalidade dos asistentes no establecemento de singularidades en mostras estudadas, como o dimorfismo foliar (dúas formas de folla) atípico nalgún exemplar, puxo de manifesto o interese para o sector de dispoñer de criterios obxectivos para a observación directa das variedades de oliveira dispoñibles, observación plasmada nunha descrición obxectiva e repetible, nun formato que permita a comparación entre variedades”, explican dende a organización.
Con todo, “cabe destacar o valor recoñecido polos asistentes á obxectividade no diagnóstico e descrición dos caracteres observados, obxectividade facilitada co emprego de protocolos normalizados de rexistro, a partir dos cales resulta factible a comparación de exemplares e a revisión independente das descricións, especialmente dos exemplares das diversas explotacións”, indican os promotores da actividade.
O acto concluíu co recoñecemento ás institucións colaboradoras “Aceiroga”, “Concello de Quiroga” e “Novas Roteiros” e a entrega de certificados de asistencia aos participantes.
Fotos cedidas.
