Quiroga dará a benvida á primavera este sábado 26 de marzo cun concerto de Dani Barreiro & Friends.
Este músico xa estivo nalgunha ocasión anterior, antes da pandemia, por terras quiroguesas deixando un bo sabor de boca. Tanto é así que fans da zona pediron á xerencia do local Ruxe-Ruxe que o trouxera en canto fose posible. E así chega Dani Barreiro, nesta ocasión acompañado de Manu Bastón (batería e guitarra eléctrica e acústica), para dalo todo a partir das 23:30 horas.
Con Dani & Friend lembraremos a música de artistas tan dispares como Andrés Dobarro, Juan Pardo, o rués Magín Blanco, Loquillo, Gabinete Caligari, Duncan Dhu, Andrés Calamaro, Quique González, Coque Malla, Joaquin Sabina… pasando por Rosendo, Burning ou Los Secretos; variando o seu ecléctico repertorio e incluíndo clásicos internacionais de diferentes artistas como Johnny Cash, Neil Young, Neil Diamond, REM, Depeche Mode, Rolling Stones, The Beatles, etc.
Os máis de 100 concertos ao ano en bares, pubs, eventos ou a súa participación en grandes festivais como Atlantic Fest ou o Festival da Luz avalan a súa experiencia, rodaxe e solvencia artística.
