O establecemento La Bodeguilla de San Lázaro, en Santiago de Compostela, acolleu onte unha presentación dos viños da Denominación de Orixe Monterrei.
A cita estaba destinada aos integrantes do “Club de Cata de las Bodeguillas” e ao colectivo hosteleiro e tiña cobo obxectivo achegar aos pequenos grupos “as singularidades dos viños de Monterrei”. O acto comezou cara ás oito e media da tarde cunha exposición sobre esta denominación vitivinícola e as súas orixes milenarias, de mans do experto Luis Paadín. A continuación foi a cata, onde se puxo en relevo os distintos tipos de viños feitos segundo as diferentes variedades das uvas, distintos solos, altitudes e tipos de elaboración.
Posteriormente, os asistentes puideron degustar, nun formato de Túnel do Viño, un total de 21 marcas diferentes procedentes das adegas da D.O. Monterrei, o que lles permitiu facer un amplo percorrido pola denominación de orixe e a tipoloxía dos seus viños.
