Na XIX Cata dos Meles de Galicia un total de 25 industrias presentaban 17 meles para concursar na categoría A, de meles monoflorais; e outros 20 para a categoría B, correspondente a meles multiflorais. Este concurso, organizado pola Consellería do Medio Rural e pola da Indicación Xeográfica Protexida (IXP) Mel de Galicia, facía entrega neste xoves dos seus galardóns, dos que catro viñan para a provincia de Ourense.
Era o caso do Mel “Montañas de Trevinca” do Concello da Veiga, que lograba o quinto posto na categoría de multiflorais, na que o “Enxebre” de González Carballal SL, con sede en Ourense, era cuarto. Ademais, no apartado de meles monoflorais o “Montañas de Trevinca” de castiñeiro quedaba sexto, sendo curto O Garabulleiro de Carlos González Iglesias, tamén de castiñeiro.
O conselleiro do Medio Rural, José González, acompañado polo director da Axencia Galega da Calidade Alimentaria (Agacal), José Luis Cabarcos, presidía esta mañá a entrega destes galardóns e tamén os da XXIII cata dos queixos, onde destacou o prestixio da gastronomía galega en xeral e o dos queixos e meles en particular grazas á calidade das materias primas e do inmensurable esforzo do sector, nun ano atípico no que quedou claro que o medio rural é imprescindible.
Os paneis de cata destes concursos estiveron formados por profesionais experimentados vencellados ao ámbito da gastronomía, da hostalería, da comunicación e do sector agroalimentario. Eles foron os encargados de analizar totalmente a cegas e de forma minuciosa as mostras, para pasar a seleccionar as marcas gañadoras que hoxe foron reveladas.
