O barquense Eduardo Ojea Arias, máis coñecido como “Potolo”, vén de tomar posesión esta mañá como novo deputado do PSdeG-PSOE pola provincia de Ourense, logo da baixa do parlamentario Juan Carlos Francisco Rivera. Ojea prometeu o cargo coa coletilla “dende Valdeorras, terra de Florencio Delgado Gurriarán”, en alusión ao autor homenaxeado no Día das Letras Galegas deste ano.
Eduardo Ojea Arias (O Barco de Valdeorras, 1957) é profesor de Bioloxía, Física e Química, exerceu a súa profesión como docente no Colexio Pablo VI de A Rúa (1985-1997), no IES Lauro Olmo, e no IES Martaguisela (1998-2020), estes dous últimos na súa localidade natal.
Dende o ano 1999 compaxinou a súa actividade profesional cunha intensa actividade social e política local, tanto dende o tecido asociativo cultural e deportivo, como dende o equipo de goberno do PSdeG no Concello, no que exerceu entre 1999 e 2005, cando foi primeiro tenente de alcalde e concelleiro de Educación, Medio Ambiente, Cultura e Turismo e portavoz municipal.
Eduardo Ojea é o segundo valdeorrés que se incorpora nesta lexislatura ao Parlamento galego, tras a ruesa María G. Albert, electa como deputada polo BNG na provincia de Ourense.
A traxectoria do novo deputado galego do PSdeG
Licenciado en Bioloxía pola Universidade de Santiago de Compostela.
Profesor de Bioloxía, Física e Química dende 1985 ata 1997, no Colexio Pablo VI de A Rúa.
Durante este período de tempo, tamén estivo habilitado como Profesor de E. Física.
Tamén, impartiu clases na UNED Valdeorras.
No ano 1997 aprobou as oposicións de Física e Química, exerceu de Profesor durante o curso 1997- 1998, no IES Lauro Olmo de O Barco.
Dende o ano 1998 ata 2020, foi Profesor de Física e Química, no IES Marta Guisela de O Barco. Dende 2015 ata 2020, foi Xefe de Estudos.
Formou parte activa no tecido asociativo, tanto cultural como deportivo, no Concello de O Barco. Foi xogador e adestrador, no equipo de Baloncesto da Vila, participando en toda Galicia.
No 2002, foi membro fundador da Asociación Cultural ” A Figueiriña”, dedicada á construción de lanchas tradicionais e a recuperación de artes tradicionais de pesca, no río Sil.
Dende 1999 ata 2015, foi membro do Grupo de Goberno do PSdeG, no Concello de O Barco.
Foi primeiro Tenente de Alcalde e Concelleiro de Educación, Medio Ambiente, Cultura e Turismo e Portavoz Municipal.
Creador das Xornadas Multiculturais, no Concello de O Barco. Xuntanza das Pandillas, co gallo de atraer durante as festas patronais, os veciños /as que non viven no Barco, para reencontrarse cos seus. Tamén foi o impulsor da Festa do Botelo, recoñecida como Festa de interese cultural, dende 2015.
