Continúan as iniciativas da ANPA do CEIP Xosé Manuel Folla Respino para recadar cartos cos que complementar o ensino dos nenos do colexio, con actividades extraescolares que os animen, motiven e sigan formando.
Nesta ocasión a idea viña en forma dun magosto benéfico que na tarde deste mércores 1 de novembro enchía de xente disposta a colaborar, o Centro Sociocultural Santa Lucía. Alí reuníanse unhas 250 persoas que, por 6 euros que custaba a entrada, degustaban unha rica merenda a base e bolo preñado, castañas asadas, lambetadas (para nenos e maiores), sandwiches para os cativos, empanada, bica e bebida.
Aínda que nun principio estaba previsto celebralo na praza José Luis Núñez, a previsión de chuvia e vento obrigaba a cambiar o magosto de lugar. No exterior asaron as castañas e xa no interior tiña lugar a merenda.
Na cita, moi próxima ao Samaín, tampouco faltaron os disfraces e sobre todo o bo ambiente, entre varias xeracións, dende os nenos ata os avós.
Fotos: Carlos G. Hervella excepto as dúas últimas da galería que son cedidas.
