Na tarde deste xoves 17 de novembro producíase un incendio nunha casa no municipio de Petín, resultando falecida a súa propietaria, unha muller de avanzada idade. “Os servizos sanitarios nada puideron facer pola súa vida, mentres que os Bombeiros de Valdeorras se encargaron de apagar o lume que afectou a unha estancia da vivenda”, explican dende o 112 Galicia, que recibía a chamada dun particular en torno ás 16:30 horas, na que alertaba de que saía lume dunha casa no lugar de Outeiro, en Petín.
O particular apuntaba tamen que “había unha persoa no seu interior” polo que os xestores do 112 proceían a avisar ao persoal de Urxencias Sanitarias-061, aos Bombeiros e ao GES de Valdeorras, á Garda Civil e a Protección Civil de Petín. Sería pouco despois cando os servizos sanitarios e os axentes da Garda Civil chegaban ao lugar, aínda que “só puideron confirmar o falecemento da única implicada”.
Pola súa banda, os servizos de extinción daban por finalizada a súa intervención preto das 18 horas, e indicaban que “o fume inundara a sala de estar, mentres que o lume afectou a varios dos mobles que se atopaban nela”.
