O xurado do Concurso de Carteis da 55ª Feira do Viño do Ribeiro reuníase na mañá do 7 de marzo na sede do Consello Regulador da D.O. Ribeiro para seleccionar o cartel deste certame, que terá lugar na vila ribadaviense do 28 de abril ao 1 de maio.
De entre os 182 traballos que se presentaban, resultaba seleccionado o deseñado por Andrés Manjarón, de Sevilla. Este rapaz, de 23 anos, rematou o ano pasado a carreira de Publicidade e Relacións Públicas, aínda que segue a estudar deseño gráfico. “A creación xurdiulle da idea de aunar un acio de uva branca co de uva tinta, facendo que entre as dúas se forme un corazón, creando unha obra visualmente atractiva á vez que amosa sentimento”, segundo se indica dende o CRDO Ribeiro. O premiado recibirá 1.000 euros.
O xurado do Concurso de Carteis da 55ª Feira do Viño do Ribeiro estivo integrado por profesionais no ámbito das artes, comunicación e deseño gráfico. Tratábase de Martina Vicente, de La Alacena Roja; José Ramón Domínguez, de Cepas y Vinos; María Campos, de Hostelería Galega e Turismo; Luis Cividanes, de Benbo; Jaime Díaz, de Incubarte, creatividad multicanal; Luis Estévez, de Oeste Marketing; María Touza, concelleira de Cultura do Concello de Ribadavia; e Erika Domínguez, directora de promoción do C.R.D.O. Ribeiro.
