Na mañá deste luns 26 de setembro producíase un accidente laboral no concello do Barco de Valdeorras. Segundo informan dende o 112 Galicia, trátase dun home ao que lle caeu unha árbore enrima cando realizaba traballos nunha zona de monte. Ademais, “a persoa ferida atopábase nunha situación inestable ao deslizarse pouco a pouco por unha ladeira”, indican dende o Axega.
Segundo indican dende o 112, o equipo médico necesitou da colaboración dos equipos de emerxencias tanto para o acceso ao ferido como para a súa evacuación desde o lugar no que se atopaba ata onde agardaba o helicóptero con base en Ourense.
Finalmente, o ferido era trasladado na aeronave coa colaboración dos Bombeiros e os membros do GES Valdeorras. Tamén era informada a Policía Local do Barco e a Garda Civil.