Dende hoxe, martes 11 de maio, e ata o 10 de xuño poderá verse no Centro Cultural Avenida da Rúa a exposición “Fillos do océano”, un proxecto fotográfico de Javier Teniente promovido por Abanca e Afundación, que ten como protagonistas ás comunidades de pescadores artesanais de todo o mundo, así como as mulleres e homes que viven por e para o mar.
A mostra reúne imaxes únicas de lugares como Galicia, Senegal, Andalucía, Nicaragua, India, Sri Lanka, Brasil, Panamá, Madagascar, Vietnam, Noruega ou Indonesia, ofrecendo a través de instantáneas, unha viaxe polo planeta, facendo fincapé na importancia da auga, da pesca, do coidado do planeta,…
No acto co que se inauguraba oficialmente a exposición esta mañá, estaban presentes o alcalde da Rúa, Álvaro Fernández; o concelleiro de Cultura, José Vicente Solarat (entre outros membros da corporación municipal); o coordinador institucional de Abanca en Ourense, Mateo Alonso San Román; e a coordinadora Institucional para Ourense e Lugo de Afundación, Beatriz Fernández-Anguiano, quenes destacaron o apartado medioambiental deste traballo, así como a contribución ao coidado do planeta das entidadades que representan.
Esta iniciativa é posible grazas á colaboración entre o Concello da Rúa, Abanca e Afundación como parte do proxecto Corrente Cultural, que considera a arte como un instrumento imprescindible para fomentar o coñecemento e o desenvolvemento colectivo. Pode verse de luns a domingo de 19 a 21 horas. Para visitas en grupo é necesario contactar co Concello da Rúa no teléfono: 988 310 116. Dende a administración local lembran que durante a visita hai que “cumprir con todas as indicacións e medidas de prevención”.
Fotos: Carlos G. Hervella