Na pasada madrugada un incendio queimaba por completo unha casa en Amandi (Sober), no lugar de Cima de Vila (Casa Pareal). “O Goberno local estivo en todo momento a disposición do afectado, desde que tivo coñecemento do acontecido a través do 112, arredor das dúas da mañá”, segundo informa o Concello de Sober. O seu alcalde, Luis Fernández Guitián, desprazouse persoalmente ata o lugar do suceso en canto tivo comunicación do incendio e volveu visitar ao afectado esta mesma mañá.
Tanto o dono da vivenda como o veciño da casa do lado están ben de saúde, posto que non sufriron danos. A vivenda ardeu por completo, polo que o seu propietario, José Vázquez, foi trasladado á casa dun familiar en Neiras. O equipo de extinción puido salvar os apeiros, o coche e o tractor.