Venda de entradas, programas de radio nacional en directo, degustacións, visitas,… Moi intensa está sendo esta fin de semana, previa á XX Festa do Botelo no Barco de Valdeorras, coa celebración da terceira edición do encontro de blogueiros e periodistas, organizado para a promoción desta Festa de Interese Turístico Galego, do Botelo, do viño de Valdeorras e da vila do Barco.
A xornada do sábado comezaba ben cediño coa venda das entradas para o xantar do botelo o 18 de xaneiro, que se esgotaban en apenas unha hora. De seguido tiña lugar a emisión en directo dende o Teatro Lauro Olmo do programa de RNE5 “Degustar Galicia” que contou coa presenza do alcalde do Barco Alfredo García, da cociñeira da Festa do Botelo Otilia Docampo e do presidente do C.R.D.O. Valdeorras José Luis Pando.
O programa está dirixido e presentado por Manuel Mariaga, un dos seis a xornalistas e expertos gastronómicos que participaron nesta edición do Blogtrip do Botelo que arrancaba esta mañá coa visita á Adega Roandi, en Éntoma. O programa continuaba a mediodía co xantar no restaurante Casa Galaica, onde coñeceron e degustaron o botelo, acompañados pola concelleira de Cultura Margarida Pizcueta e pola tarde, cun paseo polo entorno de Xagoaza e visita á “Cova dos Monxes” de Adegas Godeval; e percorrido polos bares da vila barquense coa ruta de pinchos “O Barco vai de viños”.
Un dos pratos fortes do programa está reservado para mañá domongo pola maña: visita á empresa de elaboración do botelo en Viana do Bolo: Embutidos García Marcos, onde lles explicarán a súa elaboración na propia fábrica así como todo o proceso de secado e afumado.
Fotos cedidas
