Esta noite, a partir das 22:10 horas, toda España estará pendente da televisión. E non é para menos xa que a esa hora arrancará a gran final do Benidorm Fest, o certame do que sairá o representante de España en Eurovisión 2022, e o grupo galego Tanxugueiras está sendo sen dúbida un dos grandes protagonistas.
Co seu tema en galego Terra, son o grupo de moda en Galicia, cunha mestura de sons tradicionais con outros máis modernos que as acercou ao gran público que se lanzou en masa a apoialas. Así, malia a puntuación do xurado na primeira semifinal que as relegaba ao penúltimo posto, a votación popular levábaas ao segundo posto e á correspondente praza na final desta noite.
Unha final que se presenta dura ante o favoritismo de Rigoberta Bandini, Rayden ou a gran sorpresa da primeira semifinal Chanel, todos aspirantes, ao igual que as galegas, a esa ansiada participación no festival da canción europea. Mais Olaia, Sabela e Aída, as cantareiras do século XXI que actuarán en segundo lugar, volverán subir ao escenario do Benidorm Fest coa garra e potencia que as caracteriza, vestidas para a ocasión polo estilista e modisto vianés Jorge Álvarez.
O vestiario, ideado, patronado, cortado e cosido polo propio Jorge, que esta semana cambiou a perruquería que ten en Viana polos camerinos do Benidorm Fest, xa sorprendeu na semifinal, percivíndose nas prendas a esencia do traxe tradicional galego pero adaptado á actualidade, en tons negros, onde resalta o dourado dos complementos e da maquillaxe e con bordados ao aire, esencia do traxe típico de gala, e sen perder o estilo de Jorge De Álvarez, de aí que as cantantes leven pantalón e os bailaríns saia.
Unha esencia que volveremos ver esta noite, pero moito mellor. “Na semifinal as cámaras meteron planos moi abertos e non se apreciaba ben todo o que levamos, tanto de vestiario como de maquillaxe, pero hoxe imos facelo de forma que todos os detalles se vexan ben”, asegura Jorge, recoñecendo que está moi emocionado. “Isto é grandísimo, é un soño para min que se está facendo realidade. Traballamos moito para que esta noite todo saia ben e iremos a por todas pero se non gañamos non pasa nada porque o premio xa o temos”, asegura, adiantando que “a final vén pisando moi forte”.