Esta mesma semana, o Centro de Coordinación Operativa da situación de emerxencia sanitaria acordaba dar por retomada a actividade da pesca fluvial, “respectando todas as medidas de protección individual e respectando todos os parámetros para a realización da actividade física ao aire libre, relativas ás limitacións impostas acerca dos desprazamentos e lugares permitidos, os requisitos para evitar o contaxio e as franxas horarias permitidas”. E só dous días despois, a Consellería de Medio Ambiente, Territorio e Vivenda constataba a renovación de “máis de 2.700 licenzas de pesca deportiva que se practica nos máis de 14.000 km de ríos pescables e nos 1.500 km de costa existentes en Galicia”.
Dende a Consellería lembran que para a renovación das licenzas “é necesario aboar as taxas correspondentes”, que os pescadores poden realizar a través das entidades bancarias colaboradoras, por medio telemáticos ou nas Xefaturas provinciais da Consellería de Medio Ambiente.
