Facía tempo que non se vía tanta xente na romaría de San Francisco Blanco, en Outarelo (O Barco de Valdeorras). O ano pasado xa se celebraba aínda que coas medidas sanitarias impostas polas autoridades para frear a pandemia, e non era ata este ano cando se recuperaba en todo o seu esplendor, e non só pola asistencia de numerosos devotos do santo avogado dos males de cabeza, chegados dende diferentes puntos da comarca, senón polo soleado día que amencía malia o frío, neste sábado 4 de febreiro.
Presidido polo párroco do Barco, Jesús Álvarez, o programa comezaba coma sempre días antes (o 1 de xaneiro) co triduo, e xa na mañá deste sábado, despois das dúas misas anteriores (ás 10:30 e ás 11:30h.), ás 12:30h. comezaba á procesión coa imaxe e a reliquia do santo, co acompañamento musical do grupo de gaitas Celtas Largos.
Trala procesión tiña lugar a misa maior oficiada polo párroco. Presidindo o altar, coma sempre, a reliquia de San Francisco (mártir nado no Tameirón, A Gudiña, e crucificado en Xapón), que os fieis tocaron e bicaron ao rematar os cultos.
Entre os asistentes, incondicionais grupos de amigos, entre eles os membros da Confraría de San Francisco que non faltan á cita e Enrique Rodríguez Sotelo “Fiscol”, que ía a pé dende Fontei (A Rúa) xunto a un amigo, tras unha camiñata de tres horas. Moitos deles aproveitan o día para compartir unha tapiña de polbo á feira ou churrasco na praza do pobo. Tampouco faltaron as tradicionais roscas e nesta ocasión un veciño de Outarelo convidou aos asistentes a un viño e un aperitivo.
O programa pecharase mañá coa misa na honra a San Antonio ás 13:15 horas.
Fotos e vídeos: Carlos G. Hervella.
