Varios centos de persoas reuníanse, por segundo mércores consecutivo no Barco, para pedir que se retire o anteproxecto de reforma da Lei de Saúde de Galicia, que suporía a eliminación da área sanitaria de Valdeorras. Desta volta a concentración non estaba convocada pola Plataforma Sanitaria de Valdeorras, senón pola Xunta de Persoal do Hospital Comarcal Valdeorras (HCV). A plataforma decidía desconvocar o acto ao non contar cos permisos necesarios da Subdelegación do Goberno.
Sen embargo, a Xunta de Persoal mantiña a concentración, se ben en lugar de facerse na rúa, as persoas concentrábanse no recinto exterior do hospital comarcal. Podían facelo ao contar “con permiso da xerencia do centro”, tal e como lles explicaba aos presentes o voceiro da Xunta de Persoal, Suso Vilasánchez. Tamén expresaba o seu agradecemento ás persoas concentradas e animábaas a continuar participando nas mobilizacións xa que “as cousas van por bo camiño”.