CulturaCulturaÚltima hora

O actor e humorista Alberte Montes actúa mañá en Trives dentro da súa ‘xira exprés’ por Galicia

Estará do 10 ao 13 de agosto por terras galegas para achegar ao público unha escolma dos seus mellores monólogos destes últimos anos

Publicidade
Alberte Montes, actor e humorista natural de Os Anguieiros, Montefurado (Quiroga).

 

Alberte Montes, actor e humorista galego-catalán, chegaba este mércores 10 de agosto a Compostela para iniciar unha ‘xira exprés’ con actuacións en catro localidades galegas, tres delas na provincia de Ourense.

A primeira, esta noite, levarao ao Concello de Merca para sementar de risas o Campo da Festa de Zarracós. Os anfitrións, a Asociación Veciñal de Zarracós, tíñano contratado para agosto de 2020 e por mor da pandemia non puido ser ata este ano cando por fin poidan contar con el nas xornadas culturais e festivas que organizan.

Mañá xoves 11 de agosto a intervención de Alberte será na Pobra de Trives, concretamente na praza Doutor Paz ás 22horas, e o venres 12 tocará cambio de provincia para chegar a Terras do Incio. Neste caso a actuación será na terraza do Hotel Rural Hermida, dentro do seu ciclo ‘Solpor Hermida’ que fai posible acompañar o goce dos seus fermosos solpores con actuacións en vivo.

 

 

Como remate de xira, participará nas ‘Noites de Florencio’ en Córgomo o sábado 13 de agosto. Este ciclo cultural, organizado polo proxecto de dinamización cultural valdeorrés ‘As letras de Florencio’, ten como obxectivo lembrar a figura de Florencio Delgado Gurriarán con diferentes actividades.

Os monólogos de Alberte Montes caracterízanse pola súa singular visión da realidade, sendo famosas as súas Albertadas; e tamén por amosar o xeito de ser dos galegos coas súas virtudes e os seus defectos. Neste senso, o recurso dos tópicos ten un obxectivo, non desmontalos nin erradicalos, senon transformalos e cargalos de valor. “Historicamente teñen empregado os tópicos para ridiculizarnos e mofarse de nós, feito que explicaría en parte que arrastremos algo de autoxenreira. Eses tempos foron pasando e agora xa somos quen de defendernos con orgullo dese estigma combatendo aos ignorantes, ríndonos dos propios defectos e chufando das nosas diferenzas”, afirma Alberte nun dos seus textos máis coñecido, Galego pode selo calquera.

Artigos relacionados

Back to top button