Entre os asuntos que se abordaban na sesión plenaria de setembro, celebrada esta tarde pola Corporación barquense, estaban as Festas do Cristo 2023. Así a concelleira do BNG Noa Fernández preguntáballe ao equipo de goberno socialista polo orzamento que se destinará a estes festexos neste ano.
“Levamos oito anos nos que vimos destinando uns 130.000 euros en cuestións culturais e festivas. O alumeado festivo vai nunha partida diferente, xunto coas luces de Nadal, dun total de 30.000 euros sen IVE”, explicaba a concelleira de Cultura, Margarida Pizcueta. Tamén lle preguntaba a edil nacionalista polo custe da contratación da orquestra Panorama, ao que Pizcuesta respostaba que “non chega a 15.000 euros, penso que fixemos unha negociación axeitada”.
Por outra banda, dous concelleiros do PP, Antonio Melo, e Manuel Núñez “Noli” preguntaban ao grupo de goberno local polo plan de emerxencia dos fogos artificiais. Ante isto, a concelleira de Cultura aseguraba que se lle presentou inicialmente ese plan no mes de abril na Subdelegación do Goberno en Ourense e que dende entón recibiron varios requerimentos, o último deles onte, ante os que foron enviando as modificacións pertinentes. “Isto é algo habitual”, engadía o alcalde, quen se amosaba convencido de que esa autorización ía chegar e que novamente O Barco ía ter os seus fogos na noite do 14 de setembro.
Pola súa banda, Manuel Núñez interesábase pola parte relativa á prevención dun posible incendio dentro do citado plan de emerxencia polos fogos, tendo en conta que “os bombeiros están en folga e no GES Valdeorras hai dúas persoas de baixa”. O alcalde do Barco, Alfredo García, aseguraba que non plan de emerxencia remitido a Subdelegación se inclúen oito persoas entre persoal de GES e de Protección Civil, máis a Policía Local, “pero seguramente vai haber máis de oito persoas. No lugar haberá un vehículo motobomba e ademais hoxe estiven facendo xestións para poder contar con algún vehículo motobomba máis dalgún outro GES na contorna”.
