Tras unha paréntese de dous anos por mor da pandemia, as carrozas dos Reis Magos de Oriente volverán percorrer as rúas do Barco. Será na tardiña do 5 de xaneiro ás 18h. e recuperando o seu traxecto habitual: dende a estación de autobuses do Barco ata a praza do Concello. Así o anunciaba esta mañá a concelleira de Cultura do Barco, Margarida Pizcueta, durante a presentación do programa deste Nadal no municipio. “É un programa de luxo con actividades para todas as idades e para todos os gustos. E, como novidade, temos a normalidade xa que volvemos recuperar actos como a cabalgata de Reis, que deixará de ser estática, e pasará pola estrada principal da vila, e o campamento de Nadal”, sinalaba a edil.
Ademais o programa inclúe o mercadiño de Nadal, concertos, unha exposición de selos, a Carreira do Turrón, teatro, cine, un parque de inchables (no pavillón vello e en Calabagueiros) e, tamén, a visita do Apalpador.
