O delegado do Goberno en Galicia, Pedro Blanco, nomeou hoxe a Eladio Santos Martínez novo subdelegado do Goberno na provincia de Ourense. O delegado transmitiulle este nomeamento persoalmente nunha reunión que mantiveron esta mañá na sede da Delegación do Goberno e na que Pedro Blanco aproveitou para trasladarlle os obxectivos de cara á nova etapa que se abre nesta Subdelegación.
O delegado trasladou ao novo subdelegado a esixencia de impulsar os proxectos do Goberno para a provincia de Ourense. Con el repasou os principais investimentos e programas planificados para a provincia co obxectivo de que estes proxectos e compromisos se traduzan nunha mellora para a cidadanía, o tecido produtivo e as administracións da provincia, sobre todo os 92 concellos.
Pedro Blanco destacou do novo subdelegado a súa longa experiencia profesional, sempre vencellada á docencia e próxima á súa terra. Ademais, Eladio Santos fixo carreira na política municipal do Barco de Valdeorras, deixando claro un forte compromiso por mellorar a vida dos seus veciños e veciñas, evidenciando o seu coñecemento das institucións públicas, en palabras do delegado do Goberno. Eladio Santos tomará posesión do cargo este xoves nun acto institucional que se celebrará na Subdelegación de Ourense.
O delegado amosou a súa satisfacción por esta incorporación, relevando ao anterior subdelegado, Emilio González, quen cesou por xubilación a finais do pasado mes de abril. Pedro Blanco reiterou o recoñecemento ao traballo desenvolvido por Emilio González no tempo que estivo á fronte da Subdelegación, exemplo de profesionalidade e de servizo público á provincia.
Durante estas semanas exerceu o cargo de subdelegado en funcións Manuel Arias, secretario xeral desta Subdelegación. O delegado agradeceu o seu traballo para dar continuidade aos servizos do organismo e na dirección das súas competencias.
Eladio Santos
O novo subdelegado do Goberno na provincia de Ourense naceu no Barco de Valdeorras no ano 1964. É catedrático de Ensino Secundario na especialidade de Xeografía e Historia, impartindo docencia no IES Lauro Olmo do Barco de Valdeorras desde o ano 2000 e formando parte da administración desde 1991.
En toda a súa carreira como profesor sempre participou nos equipos de innovación educativa en aspectos como a formación en novas tecnoloxías, a dinamización lectora, a inclusión e a igualdade.
Foi concelleiro de Turismo, Comercio e Promoción económica entre os anos 2019 e 2023. Na actualidade é o secretario xeral da agrupación municipal socialista do Barco de Valdeorras.